BARAZA LA MADIWANI UBUNGO LAPIGWA MSASA KUHUSU MAADILI YA VIONGOZI

Posted on: November 4th, 2021

Leo tarehe 04 Novemba, 2021 Wajumbe wa Baraza la Madiwani, Manispaa ya Ubungo wamepata mafunzo ya kujengewa uelewa juu ya masuala ya  Maadili ya Utumishi wa Umma  hususani katika ujazaji wa fomu za Mali na Madeni kwa Viongozi wa Umma.

Mafunzo hayo  yametolewa na Sekretarieti ya Maadili ya Viongozi wa Umma ambapo wajumbe hao wameelezwa wajibu na mienendo wanayopaswa kuzigatia wakiwa kama Viongozi wa Umma.

Mgongano wa kimaslahi, matumizi mabaya ya madaraka na mienendo isiyofaa kwa Viongozi na Watumishi wa Umma yameainishwa katika mafunzo hayo kuwa ni miongoni mwa tabia na mienendo isiyofaa kwa Kiongozi wa Umma.

Kupitia mafunzo hayo, wajumbe walielezwa kuwa endapo Kiongozi  wa Umma atatenda makosa ya uvunjifu wa Maadili ya Utumishi  wa umma anaweza kufukuzwa kazi, kushushwa cheo,  kuvuliwa madaraka, kupewa kalipio na adhabu nyinginezo.

Wajumbe wa baraza la madiwani wakiwa kwenye mafunzo ya Maadili kwa Viongozi wa Umma

Alifafanua kuhusu madhara ya  migongano ya kimaslahi kwa Viongozi, mwezeshaji wa mafunzo hayo ndugu Njenga Silvanus amesema ni kuvunja misingi ya Utawala Bora kwa kutumia madaraka kwa maslai binafsi badala ya maslahi ya Umma.

Aidha, wajumbe walipitishwa  namna ya ujazaji wa fomu ya kiapo ambapo kila  Kiongozi wa Umma anapaswa kuijaza kwa usahihi  kwa mujibu wa Sheria ya Maadili ya Viongozi wa Umma ya Mwaka Na. 13 ya mwaka 1995  kila kiongozi anapaswa kuwa amejaza  na kuwasilisha fomu hiyo kabla au ifikiapo tarehe 30 Disemba, 2021.

Aidha, Sekretarieti imesisitiza kiapo hicho kinapaswa kujazwa kwa umakini na kwa uhadilifu ili kuepuka taharuki  zinazoweza kutokea pindi kiapo kitakapokuwa kimejazwa tofauti.