KAMATI YA UCHUMI NA HUDUMA ZA JAMII YAPONGEZA KIKUNDI CHA VIJANA KUJIKITA KWENYE KILIMO CHENYE TIJA

Posted on: August 7th, 2021

Kamati ya Huduma za Uchumi , Afya na Elimu Manispaa ya Ubungo imefurahishwa na uwekezaji unaofanywa na kikundi cha Vijana wanaojishughilisha na shughuli za kilimo na tafiti mbalimbali ikiwa ni jitihada za kujikwamua kiuchumi na kueneza ujuzi wao kwa Vijana wengine.

Kikundi hicho kimenufaika na mkopo wa Halmashauri usio na riba kwa kupewa shilingi Milioni 30 iliyowawezesha kuandaa kitalu nyumba yaani *screen house* na kuanzisha mfumo wa umwagiliaji wa matone hali itakayoongeza uzalishaji.

Wajumbe wa Kamati hiyo wameonesha furaha hiyo baada ya kutembelea kikundi hicho wakati wa ziara ya ukaguzi wa miradi ya maendeleo kwa kipindi cha robo ya nne iliyoishia Juni 30, mwaka huu na kusema kuwa kikundi hicho kitumike kama shamba darasa Kwa vikundi vingine vya Vijana ambapo vitapata ujuzi wa kilimo cha kisasa na kinachozingatia utalaamu.

"Tunajivunia kuwa na kikundi chenye Vijana wasomi wanaotumia taaluma yao katika kujiajiri lakini pia kutoa ajira kwa Vijana wenzao lakini pia kuwa na uwezo wa kufanya tafiti mbalimbali zitakazoongeza tija katika uzalishaji wa mazao ya kilimo na mifugo

Aidha, Kamati imeshauri kikundi hicho kiwezeshwe zaidi na Manispaa  kwa kupatiwa mkopo mkubwa utakaowasaidia kutimiza malengo yao kwani kikundi hicho kina manufaa kwa jamii pia.

Kikundi hicho kinajihusisha na kulima mazao ya bustani, yaani nyanya, hoho na mboga mboga, kufunga samaki, inzi na nguruwe lakini pia kinajihusisha na uzalishaji wa funza  Wenye kiwango  kikubwa cha  protini kwa ajili ya chakula cha samaki.