MANISPAA YA UBUNGO YATOA BILIONI 1.1 KWA VIKUNDI 111

Posted on: January 7th, 2021

Manispaa ya Ubungo jijini Dar Es salaam leo januari 7 2020 imetoa mikopo isiyo na riba yenye thamani ya shilingi bilioni 1.1 kwa vikundi  111 vya  wanawake, vijana na watu wenye ulemavu  kwa ajili kuendeleza na kukuza mitaji  ya biashara zao na hatimaye kujikwamua na umasikini.

Mikopo hiyo iliyotolewa leo baada ya kupata mafunzo ya namna ya kuendesha biashara zao kwa vikundi hivyo vyenye wanufaika  1566 ambapo vikundi vya wanawake 62 vitapata shilingi milioni 560,135,200, milioni 424 161,000 kwa vikundi 38  vya vijana na  milioni 119 , 000, 000 kwa ajili ya vikundi 11 vya watu wenye ulemavu.

Wanufaika wa mikopo wakifuatilia mafunzo kabla ya kukabidhiwa mikopo

Akizungumza wakati wa kufungua mafunzo hayo na kutoa hundi ya mikopo kwa vikundi hivyo, Mkuu wa Wilaya ya Ubungo Kisare Makori  amewaeleza wajasiliamali hao kuwa utoaji wa mikopo hiyo ni utekelezaji wa sera ya serikali inayozitaka Halmashauri kutenga asilimia 10 ya mapato ya ndani kwa ajili ya kuwezesha wananchi kiuchumi na kuondokana na umasikini

Makori amesema kuwa "Nawapongeza kwa kukidhi vigezo na kupata mikopo hii, nawasii  mkaitumie mikopo hii kwa ajili ya kukuza biashara zenu na sio kununua vijora vya sherehe kwani serikali imeamuankutoa mikopo hii isiyo na riba ili ujasiriamali uwe njia ya kumkwamua mwananchi kiuchumi kwa kukuza mitaji yao"

Makori ameendelea kueleza kuwa utoaji wa mikopo hiyo unaenda  sambamba na kufanya marejesho kwa wakati ili kuongeza fursa kwa watu wengine kupata mikopo lakini pia kuongeza kiwango cha kukopesha " hivyo rejesheni mikopo kwa wakati"

"Tusififishe ndoto na nia njema ya serikali ya kukuza uchumi wa wananchi kwa kutorejesha, hengeni nidhamu na uaminifu kwenye marejesho ili tupanue wigo wa kukopesha watu wengi zaidi na kutengeneza mabilioni" amesisitiza Makori

Kwa upande wake mratibu wa mfuko wa wanawake vijana na walemavu wa manispaa hiyo Elizabeth Kebwe ameeleza kuwa vikundi vinavyopata mkopo awamu hii vinajishughulisha na shughuli za kilimo,  mifugo, uzalishaji mali, usindikaji wa bidhaa mbalimbali, viwanda vidogovidogo ambavyo vimekidhi vigezo wa kupata mkopo.

Kebwe amesema kuwa kwa  kipindi cha miaka 3 kuanzia mwaka 2017 hadi 2019, Manispaa imefanikiwa kutoa mikopo yenye thamani ya shilingi 3,966,405,785 kwa vikundi 914 yenye wanufaika 9281 na kati ya fedha hizo shilingi 1,031,003, 687.25 ndio zimerejeshwa.

Aidha Elizabeth kebwe amefafanua kuwa mikopo inayotolewa leo kuna  vikundi vitapata mkopo wa milioni 70 kikiwa ndicho kiwango cha juu kuwahi kutolewa na Manispaa kwa vikundi vya wajasiriamali  "haya ni mafanikio makubwa sana kwa Manispaa  na wajasiliamali kwani dhana ya mikopo hii ni kukukuza uchumi.

Pamoja na kutoa fedha kwa vikundi lakini pia Manispaa imefanikiwa kutoa bajaji 45, pikipiki 22 na toyo 1 vikundi vya vijana na walemavu "tunaimani vyombo hivi vya usafiri vitaanza kuwaingizia kipato,  nawasii muanze marejesho haraka zaidi" alisisitiza Kebwe.

Akiongea kwa niaba  ya wajasiriamali wenzake  stuwart  Simon banda kutoka kikundi cha  jiwezeshe  Goba ameishukuru serikali na Manispaa  ya ubungo kwa kutoa mikopo kwa wajasiriamali  ili kukuza mitaji ya biashara  zetu zitakazotusaidia kujikwamua kiuchumi.