MANISPAA YA UBUNGO YAZINDUA MIONGOZO MITATU YA UENDESHAJI NA USIMAMIZI WA ELIMU

Posted on: September 29th, 2022

Halmashauri ya Manispaa ya Ubungo imezindua muongozo  mitatu ya Uendeshaji na Usimamizi wa Elimu ambayo utasaidia kuleta mageuzi chanya katika usimamizi wa elimu na kuongeza tija katika ufundishaji mashuleni

Uzinduzi huo ni utekelezaji wa maelekezo ya Serikali ya kutaka Miongozo hiyo izinduliwe ngazi ya Wilaya pamoja na kuizindua ngazi ya Taifa ili kuleta uelewa na ufanisi katika utekelezaji wa miongozo hiyo.

Mgeni rasmi katika hafla hiyo Mkuu wa Wilaya ya Ubungo Mhe. Kheri James amewapongeza Walimu wa Manispaa hiyo kwa utumishi bora kwenye kazi zao za kila siku za kuwafundisha wanafunzi pamoja na kuwalea wanafunzi katika maadili bora ya kitanzania.

"Mwalimu ni mtu pekee anayekutana na watoto wa aina zote kila siku hivyo ana nafasi kubwa ya kuwajenga katika misingi iliyo bora kitaaluma na kijamii kwani pamoja kuwapa elimu lakini pia ni mlezi" alieleza Mhe. James

Aidha, amewataka walimu kubuni mbinu nzuri zitakazosaidia kuongeza ufaulu kwa wanafunzi kwa kushirikiana na wazazi na walezi ili kuwa na makubaliano ya pamoja na kuepusha malalamiko.

Kwa upande wake Mkurugenzi wa Manispaa hiyo  Beatrice Dominic amesema kuwa kupitia miongozo hiyo ambayo imezinduliwa leo itaenda kuleta tija kubwa kwenye sekta ya elimu na itawafanya walimu wajisikie fahari kufanya kazi yao

Pia, Beatrice  amesema kuwa Manispaa ya Ubungo imeshapokea fedha jumla ya shilingi Bilioni 1.6 kwaajili ya ujenzi wa vyumba vya madarasa 81 ikiwa ni  maandalizi ya kuwapokea wanafunzi wa kidato cha kwanza mwaka 2023

Ametumia nafasi hiyo kuwasihi walimu watakaopata fedha za ujenzi wa madarasa kutekeleza miradi hiyo kwa wakati na ubora ili watoto wote watakaofaulu kujiunga kidato cha kwanza  kuanza masomo kwa wakati na kwenye mazingira bora.

Miongozo hiyo iliyozinduliwa  na Waziri Mkuu Mhe. Kassim Majaliwa Mkoani Tabora  ni pamoja na mwongozo wa uteuzi wa viongozi wa elimu, mwongozo wa mkakati wa ufundishaji na ujifunzaji ngazi ya elimu msingi na mwongozo wa changamoto katika uboreshaji wa elimu msingi na sekondari