MKURUGENZI MANISPAA YA UBUNGO AWATAKA WATAALAM KUONGEZA KASI YA USIMAMIZI WA MIRADI YA MAENDELEO

Posted on: November 10th, 2020

Mkurugenzi Mtendaji wa  Manispaa ya Ubungo Beatrice Dominic leo tarehe 10 Novemba, 2020,  amefanya ukaguzi wa miradi  mbalimbali ya maendeleo inayotekelezwa kwenye Manispaa hiyo  yenye thamani ya zaidi ya shilingi  bilioni 9.7  lengo ikiwa  ni kujiridhisha na hali ya utekelezaji wa miradi hiyo.

Mradi wa ujenzi wa Jengo la utawala Manispaa ya Ubungo ukiwa kwenye hatua za umaliziaji

Beatrice amefanya ukaguzi huo akiwa na wakuu wa idara wa Manispaa hiyo na kuwaeleza  watalaam hao kuwa Hali ya utekelezaji wa miradi bado hairidhishi hivyo waongeze kasi ya usimamizi ili miradi hiyo iweze kukamilika Kwa wakati.

"Nadhani mnafahamu kuwa kila mradi una muda maalum wa kukamilisha, kutokamilisha Kwa wakati tunaenda kinyume na maagizo ya Serikali, nawagiza muongeze kasi ya usimamizi" alisisitiza Beatrice

Beatrice amefafanua kuwa , miradi hiyo inatekelezwa Kwa fedha za kutoka Serikali kuu na fedha za mapato ya ndani hivyo ni lazima ikamilike Kwa wakati ili kuboresha  huduma kwa wananchi  ambayo ndio adhima ya Serikali ya awamu tano

Mradi wa ujenzi wa Hospitali ya wilaya ukiwa kwenye hatua ya upauaji

Aidha, Beatrice ameendelea kueleza kuwa, mradi wa ujenzi wa standi ya daladala  Mloganzira pamoja na kuwasaidia wananchi wanaotumia hospitali ya Mloganzira lakini pia ni chanzo cha mapato Kwa Manispaa, hivyo ni muhimu kuikamilisha kwa wakati ili ianze kutumika.

Akiongea kwa niaba ya watalaam wa Manispaa hiyo warioshirizi ukaguzi wa miradi,  Mhandisi wa Ujenzi wa Manispaa hiyo  ndugu Juma S Magotto ameahidi kuongeza kasi ya usimamizi wa miradi hiyo ikiwemo kuzingatia ubora wa majengo hayo.

Miradi iliyotembelewa ni ya sekta za  Elimu , Afya na Utawala  ikiwemo  ujenzi wa stendi ya daladala Mloganzila, Ujenzi wa Jengo la utawala na Ujenzi wa hospitali ya Wilaya, ujenzi wa  hospitali Sinza, ujenzi wa vyumba vya madarasa 8, vyoo matundu 10, ujenzi wa hosteli shule ya Sekondari Goba pamoja na ujenzi wa mabanda ya soko la wajasiriamali wadogo mbezi.

Mradi wa ujenzi wa standi ya Daladala Mloganzira