RC MAKALLA AAGIZA, OFISI ZOTE ZA KATA,MITAA KUWA NA WALINZI MASAA YA KAZI

Posted on: October 12th, 2021

- Ni baada ya Mtendaji wa Mtaa wa Msumi Kata ya Mbezi ndugu Kelvin Mowo kushambuliwa  na kuuawa ofisini kwake Jana october 11,2021

Mkuu wa Mkoa wa Dar Es salaam Amos Makalla ameagiza Ofisi zote za Kata na  Mitaa kuwa na walinzi ili kuepusha vitendo vya uhalifu ikiwemo  kuvamia na kuwadhuru  watumishi Wakati wakitekeleza majukumu yao.

Makalla amesema hayo kufuatia kifo cha Mtendaji wa Mtaa wa msumi kata ya Mbezi ndugu Kelvin Mowo baada ya kishambuliwa Kwa mapanga na watu wasiojulikana Jana october 11,2021 ofisini kwake akiwa anaendelea kutekeleza majukumu yake ya kutatua mgogoro wa ardhi.

Makalla amesema "Ninaagiza kuanzia sasa  Ofisi zote za Mitaa na kata kuwa na polisi Jamii au mgambo waliopitia mafunzo Kwa ajili ya  kusimamia ulinzi na usalama katika Ofisi hizo sambamba na kufanya ukaguzi kwa kila anayeingia ofisini kupata huduma" 

Aidha, Makalla amewasihi wananchi kuacha tabia ya kuchukua sheria mkononi ya kuwadhuru watumishi au wananchi wenzao na kueleza kuwa  vyombo vya Sheria ndivyo vyenye mamlaka ya kutoa haki Kwa kujibu wa sheria   na sio vinginevyo

Nae  kamanda wa polisi kanda maalumu ya Dar Es salaam ndugu Jumanne  Muliro Jumanne alisema kuwa mpaka sasa watuhumiwa watatu wanaodaiwa kufanya kitendo hiko Jana Oktoba 11, katika ofisi  ya Afisa Mtendaji huyo wakati alipokuwa anatekeleza majukumu yake ya kusikiliza mgogoro wa ardhi wamekamatwa na upelelezi unaendelea.