UTOAJI WA ELIMU YA CHANJO YA COVID 19 WAENDELEA

Posted on: September 30th, 2021

Katika kuhakikisha wananchi wanahamasika kuchanja chanjo ya Covid19 kwa hiari, Manispaa ya Ubungo imetoa mafunzo kwa watendaji wa Kata na Mitaa ya kuwajengea uelewa juu ya chanjo hiyo ili wakawaelimishe Wananchi waliopo kwenye maeneo yao

Akitoa mafunzo Kaimu Mganga Mkuu wa Manispaa hiyo Jason Makanzo aliwaeleza Watendaji hao kuwa chanjo hiyo ni salama na haina madhara mabaya kiafya kama watu wengi wanavyosema

'Chanjo hii ni salama imefanyiwa utafiti na wataalamu wa Afya ndio maana Serikali imekubali itumike kama kinga ya ugonjwa wa Corona" alieleza Jason Makanzo

Jason Makanzo alieleza kuwa, habari za kusema inapunguza nguvu za kiume, damu kuganda na mambo mengine sio kweli "twendeni tukahamasishe wananchi wachanje kwa hiari ili kujikinga na ugonjwa huu ambao unahatarisha maisha ya watu wengi na kusababisha vifo"

Akiongea kwa niaba ya Watendaji hao Rosina Kimario  alisema kuwa baada ya mafunzo hayo wataenda kutekeleza jukumu la kuhamasisha wananchi katika maeneo yao juu ya faida ya chanjo hiyo ili wachanje Kwa hiari yao baada ya kupata Elimu hiyo.