VIONGOZI UBUNGO WAPIGWA MSASA MFUMO MPYA WA KIELEKTRONIKI WAUKUSANYAJI WA USHURU WA MAEGESHO

Posted on: November 25th, 2021

Wakala wa barabara za vijijini na mijini Tanzania (TARURA) imetoa mafunzo elekezi kwa viongozi wa Wilaya ya Ubungo wakiwemo Kamati ya Ulinzi na Usalama, Madiwani na Wataalamu juu ya uanzishwaji wa mfumo mpya wa kielektroniki wa  kukusanya ushuru wa maegesho unaoitwa TeRMIS App  ikiwa ni mkakatibwa  kuongeza mapato na kuboresha miundombinu ya barabara    

Akitoa ufafanuzi malengo ya kuanzisha mfumo huo Geofrey Mkinga meneja wa TARURA Mkoa wa Dar Es Salaam alisema kuwa utaongeza ufanisi wa ukusanyaji mapato ya serikali yatakayosaidia kuboresha maendeleo ya barabara na kusaidia wateja kufanya maombi na kulipia huduma bila kufika ofisi za TARURA hali itakayopunguza usumbufu kwa wateja.

Mkinga amesema kuwa mfumo huo utaanza kutumika rasmi  Desemba 1, 2021  hivyo watumiaji wote wa vyombo vya moto wajiandae kuanza kutumia mfumo huu ambao ni rafiki na rahisi zaidi.

Kuhusu gharama za ushuru wa maegesho hayo ,Mkinga  ameeleza  kuwa mtumiaji wa maegesho anatakiwa kulipa tsh 500/= kwa saa na tsh 2,500/= kwa siku

 Mkinga ameendelea kueleza kuwa , mtumiaji wa maegesho anatakiwa kulipa ushuru wa maegesho ndani ya siku 14 tangu alipotumia Maegesho na endapo atashindwa kulipa ndani ya muda huo anatakiwa kulipa ushuru wa maegesho pamoja na faini ya tsh 10,000/=. Aidha wananchi wanapaswa kujua mwisho wa mipaka ya maeneo yao na kuacha kutumia maeneo ya TARURA kiholela pia wanapaswa kujua kuwa fedha za ushuru wa maegesho zinazokusanywa na wakusanya ushuru ni za serikali na sio zao binafsi.

Kwa upande wake Mkuu wa Wilaya ndugu Kheri James amewapongeza TARURA Kwa kuweza kuanzisha mfumo huo wenye kuleta tija kwa jamii.